نصائح مهمة لطلاب الجامعه الجدد

نصايح للي داخل كلية 😂😁😂

➊ الصحااااااااااااب، أهم حاجة في الجامعة الصحاب، بدون مبالغة.
حط نفسك في شلة بتذاكر وبتحافظ على الطاعات في الجامعة (ولازم الاتنين على فكرة)، ما لقيتش الصفتين، حط نفسك في شلة بتذاكر (لو لقيت ولاد بيذاكروا يعني والعياذ بالله)، وشلة تانية بتؤمرك بالمعروف وتنهاك عن المنكر.

➋ دايمًا أعد تقييم أهدافك من العام الدراسي، ولو ركزت أنك تكون محترف في تخصصك، وتطلع من الأوائل فدي خدمة عظيمة للعلم وللأمة، وأغلبنا فشل في كده للأسف، لأن الموضوع بتاع التفوق دا مش سهل خالص والله، صعب بطريقة مملة، لأنك ساعات بتضطر تذاكر حاجة ما لهاش لازمة، وساعات بتضطر تبذل مجهود مضاعف في حفظ حاجات أنت واثق أنها ما تسواش 3 تعريفة، وساعات بتضطر تستحمل أنك تكون الطالب والمدرس معًا عشان المدرس فكسان ومش فاهم حاجة، وساعات بتضطر تستحمل مدرس غلس عشان أنت عاوز تبقى متفوق، وساعات بتضطر تستحمل مدرسة آخرها تعليم منزلي وهي دكتورة جامعة، وساعات كتير بتبقى الساعات دي متجمعة مع بعضها، بل أغلب الجامعات كده، والحاجات الحلوة اللي بتيجي تخليك ما تكرهش العلم وأهله بتبقى قليلة جدًا، فهو مش حاجة سهلة على فكرة، ومحتاج مذاكرة زي بتاعت الثانوية كده بس على خفيف، يعني كل يوم لازم تكون هتذاكر حاجة، والله المستعان.

➌ اقرا في تخصصك برا الجامعة، وارحم من نفسك من دايرة الجهل المغلقة اللي بيبقى فيها أغلب أهل التخصص، اقرا في تخصصك واتمكن فيه، حتى لو مش هتطلع من الأوائل، بس لازم تقرأ في تخصصك وتبقى برنس فيه، بغض النظر عن مناهج الكلية وشغلها.

➍ فلوسك أو فلوس أبوك مش حقها أنها تقعد تتصرف في كورسات وورق وبتاع، روح المحاضرة واكتب بنفسك يا حبيبي. وابقا الجأ للورق دا آخر السنة.

➎ بالنسبة للشباب: عارف البنات؟ وحشين، ما تقربش منهم يا حبيبي، التعامل يبقى واضح وبحدود ومفهوم، لكن سيكي ميكي والفيل صديقي، هتطلع آخر السنة وأنت شايل مادتين واحتمال تبقى شايل عيلين برضه!
وبالنسبة للبنات نفس الكلام.

➏ ذاكر، المذاكرة حلوة والله.

➐ اتعود في الكلية أنك تاخد القرار اللي أنت حابه وحاسس بيه، خش اللي بتحبه، خش اللي بتحبه، خش اللي بتحبه، خش اللي بتحبه، خش اللي بتحبه، خش اللي بتحبه، خش اللي بتحبه، خش اللي بتحبه، خش اللي بتحبه، خش اللي بتحبه.
خش إيه؟  اللي بتحبه.
مصر كده كده ما فيهاش شغل يا حبيبي، مش هيبقى فقر وتعب نفسي كمان، خش اللي بتحبه وأدي فيه وفكك من الباقي.

➑ ما تحبسش نفسك في الكلية وتخصصاتها : اتعلم في كل سنة مهارتين جداد ما كانوش عندك في اللي قبلها، ولازم واحدة من المهارات دي تكون الإنجليزي ويستحسن إضافة لغة أجنبية أخرى.
ومهارات عصر المعلومات دا كلها ضرورية، زي مهارات الكمبيوتر وغيرها، إن شاء الله كنت داخل المعهد العالي للكيّ والطيّ.
وبرضه ما تتعلمش حاجة عشان هي الموضة أن الناس بتتعلمها، اتعلم اللي هيفيدك واللي هيقويك معرفيًا وبس.
مش كل شوية ألاقيك مسجّل لي في الدبلومة الشاملة للبطيخ بدون بذر، شوف أنت محتاج إيه واتعلمه.

➒ لو في فرصة تشتغل باللي بتتعلمه، فدي أحسن حاجة ممكن تعملها وأنت طالب.

➓ الدعاء سلاح فتّاك أقسم بالله ودا مش كلام نظري، جرّب تدعي وبإلحاح وانبهر بالنتايج.

⓫ الكلية كلها ملهيات عن الله واليوم الآخر، حافظ على حقوق الله وتذكر اليوم الآخر.

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *