جوزك هايتجوز عليكى ….. تعالى اقولك تعملى ايه

جوزك هيتجوز عليكي

او حتي اخد القرار تعالي اقولك شويه معلومات عن قرار الجواز التاني يمكن تساعدك تتعاملي مع المرحله دي من حياتك

قرار الجواز التاني والمعاني اللي احنا بنديهاله عامل مؤثر جدا في تاثير القصه دي عليكي

مبدأيا في حالات كتير وكل حاله ليها ظروفها

في حاله ان الراجل ده مكنش في دماغه الموضوع وبعدين ظهر في حياته حد حصل اعجاب وانجذاب واحيانا انبهار وابتدوا يقربوا وحصل تجاوب منها وابتدت مرحله الانبهار والعشق وخد قرار الجواز منها وهو في الحاله دي

بعيدا عنك انت متخيله اي انسان في الحاله دي بيتصرف ازاي

بيحكم عقله اد ايه

بيقدر يشوف العواقب اد ايه او يقدرها ازاي

غالبا هو بيبقي زي المدمن اللي معاه فلوس كتير ومكان ياخد فيه مخدرات ولسه بصحته فاي حد هيقف في طريقه هيفرمه وهيشوفه عدوا ومش هيبقي شايف ان اللي وقع في حبها دي انسانه فيها عيوب ومميزات لا هيشوف انها ملاك وحتي لو فيها عيوب هيقول انه بيعرف يتعامل معاها

طبعا بعد ما المرحله دي ما تعدي استمراره في القرار ده معتمد علي مدي التوافق الحقيقي اللي بينه وبين الانسانه دي عشان كده في علاقات بتخلص خلال كام شهر من الجواز او اخرهم سنه وبيرجع عن قراره  وفي اللي بيكمل وبيستمر في قراره

طيب لو ربنا قدرلك ان جوزك في المرحله دي اعمل ايه عشان اخرج منها بأقل الخساير (اقل الخساير مش مفيش خساير )

اولا
متاخديش الموضوع علي نفسك او انك كده اقل وفي حد يستاهل الحب اكتر منك كلنا نستاهل الحب وان شخص مشاعره اتغيرت ناحيتك حبه قل او حتي راح خالص ده مش معناه فشلك او نجاح الطرف التاني دي ارزاق بتاعت ربنا فمتحسبيهاش بالعقل دي اوحش مني دي قصيره وانا طويله دي بيئه وانا بنت ناس ده مش معيار ولا انت داخله في مسابقه ولما جوزك حبك واختارك مكنتيش وقتها اجمل بنت في الدنيا كنت انت بمميزاتك وعيوبك وربنا رزقك بحبه

ثانيا

حب جوزك واحساسك انك الوحيده اللي في قلبه رزق من ارزاق ربنا اوقات بيقل شويه اوقات بيروح بس لسه في ارزاق كتير اوووي اهمهم صحتك الجسمانيه والنفسيه وولادك واستقرارهم النفسي وبيتك وعطاء زوجك ليكي ماديا ومعنويا فارجوكي اعتزلي ما يؤذيكي
متدوريش في الشات
متدوريش في الصور
متدوريش في face book
انت بني ادمه ممكن جدا اللي هتشوفيه يعملك جراح رهيبه صعب تلتئم ده غير انه تجسس والتجسس حرام وغير انه ممكن  يملا قلبك غل ممكن متقدريش تتحكمي فيه وتبتدي تنتقمي في شكل
كلام فاحش عنها
وكلام في اهانه لزوجك
وممكن ده يحصل قصاد ولادك ويأثر علي نفسيتهم

فحبي نفسك ومتحطيش ميه نار علي الجرح

تخيلي كده لو انت عامله عمليه ينفع تروحي تشيلي اابلاستر كل شويه وترشي علي الجرح ملح ؟؟

كده العمليه هيحصل فيها مضاعافات الله اعلم هتوصل لفين

فخلي بالك من جرحك

طيب انت اتجرحتي

الجرح ده محتاج عنايه وعنايه مش شويه
في اول كام يوم من العمليه هتبقي بتصرخي من الوجع ينفع نقولك متصرخيش لا هنسيبك تقولي اااه

بس هتقولي اللي انت حاسه بيه

في جوابات بقي

في اوديوهات

وبعدها تروحي تاخدي مسكن (خروجه -كورس بتحبيه -طقم لطيف نفسك تشتريه ) وتبتدي ترجعي لحياتك الطبيعيه بالتدريج بس اكيد مش بكامل قوتك

طيب لو حد خبطك في الجرح وفتحه تاني

محتاجه الاول تطمني علي جرحك وتعبري عن وجعك تاخدي مسكن وتكملي حياتك

طيب انا مش قادره استحمل وتعبت

هطلب منك تصبري بس علي نفسك ٦ شهور عرفتي تتأقلمي عرفتي معرفتيش انت حره في قرارك بس اتاكدي ان انسحابك من العلاقه دي مش هيخلي حياتك اوحش وارجوكي متاخديش القرار وانت موجوعه اي حد وهو موجوع هيبقي عاوز يعمل اي حاجه عشان يخف بس مهم يطمن ان الحاجه دي هتساعده يخف مش هتعمله بلاوي جديده

طيب دي الحاله الاولي
طيب لو جوزي مفيش حد في حياته وهو عاوز يدور علي عروسه ويتجوز عشان حاسس اني مش مكفياه مع اني عامله كل اللي عليا ولما بقوله اعمل ايه تاني بيقولي ولا اي حاجه انا عايز اعدد وده حقي الشرعي وعايز بقي يعمل الموضوع ده بشكل عقلاني

طيب كون ان في حد عنده طموح في الستات وعايز يطور حياته في المنطقه دي ده معناه انك انت عندك مشكله ؟؟

هو في ست في الدنيا كامله ولا في راجل كامل ؟

عارفه ان ربنا ادي الاوبشن ده للرجاله وانت بتقولي بينك وبين نفسك ما انا برضه ناقصني كتير معاه كنت رحت اتجوزت ؟

هو بقي عنده اوبشن وعنده طموح وبيدور يحققه انت بقي تشوفي نفسك ست فاشله ليه

هتقوليله هو عينه زايغه هقولك كلامك منطقي اكيد كان بيبص ويقارن سواء قبل ما يتجوزك او بعد مش شرط يكون راجل خاين ممكن يكون كون خبرات وعاش احاسيس قبلك وافتقدها معاكي وبيدور يعيشها تاني عشان عايز يبقي اسعد
وممكن يكون فعلا مبتلي بزنا النظر وهو اللي جابه لروحه ويبقي يقابلني لو رضي

في الحاله دي بقولك اهدي خالص هو بيدور علي صفات معينه عشان يوصل بيها لاحاسيس معينه متخيله هو بياخد القرار ازاي ؟

متخيله كميه الاحتمالات اللي هو محطهاش في دماغه ؟

جايز ميلاقيش اصلا فيها اي صفات من اللي بيدور عليها
وجايز تبقي فيها وتتغير او تقفل منه لاي سبب
وجايز يبقي فيها الصفات دي وميتبسطتش

وجايز ياخد القرار وميتبسطتش ويرجع يلاقيكي قفلتي منه وميعرفش حتي يتبسط باللي عايزه بس في الوقت ده اللي حاسس انه هيروح لحته تحفه مش هيكلم نفسه كده

هيبقي متفائل ومتأكد ان كل الاحتمالات حلوه وانه يقدر يحل اي حاجه وحشه هتحصل
طيب انا عرفت منين انه بيفكر كده؟

عشان صعب ناخد قرار خسايره كتير زي الجواز التاني الا لو شايفيين مكاسب كتير جدا للقرار ده

وتلاقيه كل العقبات يبسطها كده ويبقي وثيق من الفوز 😂

وانه هيعدل رغم صعوبه الامر بوصف القران

بس شوفي بقي سبحان الله هو هيعدل وهيدكي حقوقك كامله وحقوقها كامله اللي كان خلقه بيضيق لما حد من ولاده يشتكي من حاجه حاسس انه عامل اللي عليه فيه 😂ويقوله عاوز حقي يا بابا

فسيبك من الكلام الكليشيه اللي مش منطقي ومتناقشيهوش فيه اسمعيه وقوليله رد منطقي جايز فعلا تنورى في دماغه ان القصه مش بالبساطه دي

طيب صمم بقي واقتنع بعد ما درس وفكر كتير (بنفس الطريقه المتفائله بس كتير بقي 😂) وقالك انا هاخد القرار

هنا بقي حضرتك متبقيش متفائله زيه وتقولي خلاص دي نهايه المطاف

لان ده قرار اسري

مش قرار فردي

انت وولادك هتتاثروا بيه

فمهم جدا الوقت ده تديري الامور بحكمه وتشتركي معاه في القرار حتي لو ده مؤلم
وتطلبي حقك بوضوح
متاخديش الموضوع بحساسيه وتقولي انا مش عيزاه

ولادك محتاجين يشوفوا علاقه سويه اي ان كانت يا متجوزين بينهم ود واحترام يا مطلقين بينهم احترام

لكن متجوزين علاقتهم زي الاغراب في هنا خطوره واحتمالايات عقد نفسيه غير عاديه من الجواز والاسره

طيب انا مش قادره ومش طيقاه

خدي بريك واتعاملي مع جرحك وارجعي حياتك بالتدريج

لا تيجي علي نفسك ولا تستسلمي

طيب يعني اللي عمله ده حقه ؟

يتجوز عليا بعد كل العشره والتحمل اللي شفته معاه ؟

عايزه تسمعي ايه انه مش حقه ؟ وانه ظلمك وانه اناني وبصباص

الكلام ده هيهدي غضبك شويه بس هيرجع تاني تفريغ المشاعر والنشاط المبهج والرجوع للحياه بالتدريج هما اللي هيساعدوكي فارجوكي ركزي فيهم وسيبي قصه الحقوق دي علي اللي خلقك لان مفيش بشر هيقدر يحكم علي بشر زيه الا لو سمع من الطرفين بحياديه وكان الضرر اللي واقع عليكي واضح وملموس

لكن في اضرار محدش هيحس بيها يا قلبي 🙁

طيب انا عملت ايه غلط ؟

طيب حتي لو عملتي غلط ده شرط يكون سبب للقرار ده ما في ناس غلطوا اكتر منك وازواجهم متجوزش عليهم فكل بيت وله ظروفه وكلنا بنغلط وهو بيغلط وكل الغلط ده كان في الماضي خلينا في الحاضر لان هو ده اللي نملك سعينا فيه

طيب اطلق ولا اكمل ؟

ابوس ايدك يا شيخه بلاش قرارات وانت مجروحه

طيب انا مش قادره استحمل ؟

افتكرى لما ولدتي كنت تعبانه ازاي ومع الوقت والرعايه ربنا قدرك

طيب انا مش طيقاه ؟

خرجي مشاعرك في جوابات ليه وعيطي في حضن حد بيحبك وبعدين افتكرى الحلو ولا تنسوا الفضل بينكم

طيب هو انا لو كملت معاه ميبقاش عندي كرامه ؟

ده قرار تاخديه انت بناء علي انت هتبقي اسعد واحسن لو عملتي ايه ملوش علاقه بالكرامه احتمال تكوني كملتي عشان لسه قلبك قادر يحبه رغم الجرح
عشان انت مضحيه وشفتي في استمرارك حياه احسن لولادك
عشان عندك اهداف تانيه عايزه تحققيها غير انك تستقلي بحياتك

وبرضه اللي بيقرر يمشي ممكن يمشي لاسباب كتير غير انه مش عاقل وضعيف

طيب انا ليه بكتب الكلام ده

بحاول افكر مع الناس اللي الموضوع بالنسبالهم بقي امر واقع

طيب انت مع ولا ضد الجواز التاني

انا مستحملهاش وهطلب الطلاق لو ده حصل بس مقدرش اقول راي في شرع ربنا وانسحابي من علاقه فيها واحده غيري نظرا لضعف قوتي وقله حيلتي وده راي دلوقتي احتمال لو اتحطيت في الموقف ده ربنا يقدرني واغير راي 😞

طيب ما تقولي كده كلمتين للرجاله الجواز التاني بيعمل ايه

مقدرش لاني معرفش بس اللي اقدره اقولهولهم
ان الكمال لله وحده واللي بيفضل يدور علي اللي ناقصه صعب جدا يستمتع باللي معاه حتي لو معاه ٤ ستات 😊

فقرار هيعمل الخساير النفسيه الرهيبه دي لحبيبتك وزوجتك وام اولادك يستاهل انك تحكم عقلك كتير وتدرس ابعاده ومتصدقش كل اللي بيتقالك من الرجاله اللي بتعدد لان انت لسه مشوفتش الحدوته بتاعتهم لاخرها 😊

الحاله الاخيره اللي متكلمتش عنها حاله الراجل متعدد العلاقات الحرام لاني معنديش اي فكره غير العلاج النفسي اقدر اقدمها كنصيحه مش تقليل والله نصيحه حق

الريجيم السحري لإنقاص الوزن بسرعه وبدون حرمان

فوائد خل التفاح للبشره والشعر وتخسيس الكرش

نصائح للعوده الى العمل بعد الوضع

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *